Uns Ströppche-Klaaf-Schmölzche

Wie dat Wood et ald säht, et geiht öm uns Ströppcher, de Ströppcher en de Kölner Kinder-gääde. – Mer han uns vürgenomme, do för de kölsche Sproch zo werbe un dran zo arbeide, dat ald de klein Puute jet üvver Kölle un de kölsche Sproch liere. – Dozo lese mer vör ov spille kölsche Leedcher (per CD ov bluetooth vum Handy). – Un mer künne Üch bereechte, dat mäht Spass un kütt bei de Pänz ärg god aan! - Jeder vun uns em Schmölzche, aktuell sin mer vier Lückcher, hät si eige klein Konzepp, wat hä met dem Kindergaade avgesproche hät. – Z.B. uns Josi Feldmann, dat hät sich e klei Handpöppche, der Määtes, zosammegeknuv. Do han die Pänz vill Spass dran. Ov unse Schmölzche-Sprecher, dä Dieter Meier, da arbeid met ner Klappmuul-Popp, dat es ne lila Vugel un dä heiß Tuppes.

Alsu leev Kölsche: traut Euch un versökt et ens – mer helfe Üch gään un god!

Mail an d`r Baas Dieter Meier unger stroeppche-klaaf@fruende-akademie.de,

mer freue uns, baal von Üch zo hüre!

Jahresbericht zur „Fründe-Hauptversammlung“ am 11.06.2024

Leev Fründe vun d`r kölschen Sproch,

als Baas vum Schmölzche „Ströppche Klaaf“ un kommisariche Baas vum Schmölzche „Kölsche Verzällcher“ dun ich Üch hügg gään üvver de letzte Zigg, de Aktivitäte un Personalie bereechte.

Dat Schmölzche „Ströppche Klaaf“ ess jo en Neugründung bei d`r Fründe!
Mer han uns vürgenomme, do, en de Kindergääde för de kölsche Sproch zo werbe un dran zo arbeide, dat ald de klein Puute jet üvver Kölle un de kölsche Sproch liere. Dozo lese mer vör ov spille kölsche Leedcher (per CD ov bluetooth vum Sprechknoche (Handy). Vill arbeide mer och, met vun uns Schmölzche-Metgleeder en et Kölsche üvversetzte Kinderböcher. – Die Bildcher vun de Böcher hät d`r Wolfgang Hansen engescannt un esu kann mer die klein Bildcher god met nem Notebook ov Beamer de Pänz zeige. Noch besser ävver sin uns Kamishibai-/Verzälltheater-Verzällcher, dovun han mer ald bal 20 Stück un och en et Kölsche üvversatz: z.B. Der Drache Furzipups ov Die kleine Hexe ov Die Bremer Stadtmusikanten ov Die Olchis ov Tomte Tummetot ov Wie der Apfel wächst Wat ene Kamishibai ess? – Jo dat es ne DIN A3 große Holzkaste, süht ald us wie en klein Bühn, en dä kann mer Bildkaate erenstecke un kann dann dozu e Rümche verzälle. Un natürlich gon mer met de klein Puute och en et Hännesche Theater! Esu han mer en de letzte 12 Mond zosamme rund 200 Termine absolveet. Un mer künne Üch bereechte, dat mäht Spass un kütt bei de Pänz ärg god aan! Jeder vun uns em Schmölzche, aktuell sin mer fünf Lückcher, hät si eige klein Konzepp, wat hä met däm Kindergaade avgesproche hät. Dat sin aktuell:

• Josi Feldmann
• Wolfgang Hansen
• Dieter Meier
• Renate Schüller
• Dieter Schwarz

Alsu ... et wör jo ärg schön, wann der Eine ov Andere von Üch an einem vun dä zwei Schmölzcher (Ströppche Klaaf ov Kölsche Verzällcher) Interesse hät. Alsu leev Fründe: traut Üch un versökt et ens – mer helfe Üch gään un god!
Un - es dat nit besser wie zo Hus en der Lappekess zo lige ov vör der Äugelskess zo setze?

Dieter Meier