Kölsche Verzällcher
![](assets/images/3/K%C3%B6lsch-Verz%C3%A4llcher-Team%20Jan%202024-2c00e5b3.jpg)
Seniore un die kölsche Sproch – dat es hee en Kölle jet, wat god zosamme pass un och vill Seniore un Seniorinne am Hätze litt
Un esu kom et, dat dat ein ov andere Metgleed der Fründe vun der Akademie för uns kölsche Sproch e. V. sich üvverlaht hät, su e Schmölzche för de Seniore widder oplevve zo looße.
Woröm oplevve? No jo, vun 2006 bes 2021 gov et ald ne Vörgänger vun de „Kölsche Verzällcher“, dat wor dat „Klaaf-Schmölzche“. Dä Freddy Müller hät dat domols en et Levve gerofe un zick 2012 wor et Marlies Marks die Sprecherin dovun.
Ävver wie dat esu mänchmol kütt – et gov Knies, do nit all em Verein wore un och nit eren gon wollte – un dat wor et dann……
Et gov immer Seniorenenrichtunge, die däten sich för dä Klaaf, kölsche Adventsnohmeddage usw. interesseere.
Met däm Dieter Meier, och der Baas vum „Ströppche-Klaaf“, wor baal ne Baas för de „Kölsche Verzällcher“ gefunge.
Am 26. Juli 2021 ging et met däm Josef Richters loss. Sing kölsche Rüümcher un Verzällcher kome em Städtische Seniorenzentrum en Riehl (fröher Riehler Heimstätten) ech god aan.
Donoh kom dat Beate Nielen met singem selvsgeknuuvte Vördrag em Johanniter-Haus en Zollstock, dozo.
Nit zo vergesse es, dat all Vördräg met schöne aal kölsche Leedcher garneert weede.
Och ne ärg gemödliche kölsche Adventsnohmeddag hät dat Schmölzche, zosätzlich ungerstütz vum Anita Engels vum „Ströppche-Klaaf“, em „Zentrum für Betreuung und Pflege Phönix“ en Weidenpesch organiseert un durchgeföhrt.
Un eins künnt Ehr Üch secher vörstelle, dat mer uns ärg freue däte, wann mer noch jet Verstärkung kriege däte! - Un de aal Lückcher hätten och Ehr Freud dodran.
Üüre Dieter Meier